Romans 15
E Kristo i Vakasiri a Vilo
1Si lohoka vona a maki nga, a Vure i uka ma ge pelekado hita vona. Pali si gi hatenono ne huriki ri mangenge ni kani, o ni rata a maki nga. Nahea si gi rihate ne ria. Nahea si gi ramai kunana a ningaru ne hita. 2 aSi gi rata kamumu ria, ri gi vivi. Si gi tuhori ria ri gi laho kamumu turana Vure. 3 bE Kristo tara i uka ma i rata kunana a maki ge vivi vona. A maki i ratea i muri mai a ngava ni here puru hosi, i maea, “Na tahuna e huriki ri ratapile ioe na ngava, i manga iau tara, ri ratapile iau.”4 cA ngava lobo ni here puru hosi, ni here ge tovo hita, si gi hatenono. Ri vakatora a niluhoi ne hita si gi pasimata na Vure ge rata a maki lobo i taki tora hita vona.
5A Vure ia a vuhuna a naro ni hatenono, a naro ni vakatora a niluhoi na viri. Ge rata mua mu gu made na nivalemu, i ramai a vilone Isu Kristo. 6Muri bara mu pesi palupu ni kavurikea a Vure ne Isu Kristo, re Tamane Bakovi Dagi ne hita.
7 dI mavonga, mu vangaru i manga e Kristo i ngaru mua, lakea e huriki ri gi kavurikea a Vure na tahuna ri matai mua mu rata mavonga. 8 eE Kristo i valai ni kori mia e huriki a Iuda, ge vakasiri a Vure i ta muholi na tahuna i rata a ngava dagi turana e huriki a gare ne mia hosi. 9 fE Kristo i valai, ge rata mua e huriki i uka ma mua a Iuda mu gu kavurikea a Vure vona a nidodo vona. I manga a ngava ni here hosi, i ta maea,
“Ga kavurike ioe na matane huriki i uka ma ria a Iuda.
Ga kalolo, ga kavurikea a ramu.”
10 gA Hinere tara tabu i ta maea,
“Mua e huriki i uka ma mua a Iuda, mu vivi turana e huriki a Iuda.”
11 hI ta maea tabu,
“Mua e huriki i uka ma mua a Iuda, mu kavurikea e Bakovi Dagi.
E huriki lobo ri gi kalolo, ri gi kavurikea.”
12 iE Isaia a propet i here puru hosi, i ta maea,
“A hamone Iesi bara i valai,
ge vakatubu ni matakari e huriki i uka ma ria a Iuda.
Bara ri pasimata vona ge korimule ria.”
13A Vure a viri i rata mua mu pasimata vona ge rata a maki lobo i taki ge rata. Ge habi ne mua a nivivi, a nivalemu na tahuna mu luhoi tora ia. I mavonga, a Hanu Kiripiripi ge rata mua mu gu pasimata hateka.
E Paulus i Vivi na Leho Vona
14Mua e huriki a turagu, a lohoka vona mu rata vakaroro a naro kamumu. Mu lohoka kamumu vona a nitana Vure, i kara mua mu gu vatovo vona. 15 jPali a ngava ranga a here lakea ne mua, a here kavakava, ga vakalohoka tabu mua, a vuhuna a Vure i rata kamumu iau, 16i rata iau ge iau a vora ne Isu Kristo. I rata iau a manga a prister ne huriki i uka ma ria a Iuda, a vakalongo ria vona a Velenga Kamumu na Vure. I mavonga e huriki i uka ma ria a Iuda bara ri manga a nihabi, a Hanu Kiripiripi i habi liu lakea na Vure, a Vure ge vivi.17I mavonga, a vivi vona a leho na Vure a ratea, a vuhuna e Isu Kristo i korimule iau. 18I uka ma ga ta na maka maki tavula. Ga ta kavakava kunana na leho e Kristo i habi a nitora nau ni rata. A leho nau, a vakalongo, a vakasiri a nitana Vure ne huriki i uka ma ria a Iuda, ri gi longototo. 19A Hanu Kiripiripi i habi nau a nitora ni rata a nivakasiri, lakea i vakatubu o Ierusalem, i vano liu o Ilirikum, a vakalobo a leho nau ni vakalongo a Velenga Kamumu ne Kristo. 20 kA ngaru hateka ni vakalongo a Velenga Kamumu ne Kristo na maka tanga i uka ma ri longo ma, a vuhuna a koi ni leho langa tabu na leho na viri i vakatubu mugea pali. 21 lI manga a ngava ni here puru na Hinere, i ta maea,
“E huriki i uka ma ri longo ma, bara ri longokilala,
E huriki i uka ma ni vakalongo ma, bara ri longokilala.”
E Paulus i Ngaru ni Matai e Rom
22 mRa i mavonga, balaka kupo ta ga lakea ne mua, pali a dala nau ni putukari. 23Na pida i kupo a ngaru ni matai mua. Pali ngane, a tanga lobo na tabeke nga ri longo pali a Velenga Kamumu, 24lakea ngane ga lakea o Spein. A pasimata ni matai mua na tahuna a polo na tanga ne mua. A ngaru ni made turane mua popote, muri mu tuhori iau na nilaho nau, ga vano. 25 nPali ngane ga sike taro o Ierusalem, ga taparaki a moni ne huriki a tara ne Kristo vonga, 26 oa vuhuna e huriki a tara ne Kristo na tabeke ne Masedonia, e Akaia, ri habi a moni ni tuhori e huriki a tara ne Kristo ranga o Ierusalem ri matasia. 27 pRi vivi ni kori ria. I manga a makoli ne ria, a vuhuna e huriki i uka ma ria a Iuda ri longo a Velenga Kamumu, ra i valai ne huriki a Iuda. I mavonga i kamumu ri gi koli, ri gi kori na moni e huriki a Iuda matasia. 28Ga taparaki taro a moni nga, muri ga malaga o Ierusalem, ga lakene, ga matai mua. Muri bara lakea o Spein. 29 qA lohoka vona, na tahuna a made turane mua, e Kristo bara i vakabagetu hita.30 rMua e huriki a turagu, hita a tara ne Isu Kristo a Bakovi Dagi. A Hanuna Vure i rata hita si vangaru. A ngaru hateka si gi rura ni vasileki na Vure, ge tuhori iau. 31Mu vasileki na Vure ge korimule iau na limane huriki a Iuda o Iudea i uka ma ri luhoi torea e Kristo. Mu vasileki vona e huriki a tara ne Kristo o Ierusalem ri gi vivi vona a moni ga habi ne ria. 32Mu vasileki maea, a Vure ge ngaru, bara luve ne mua. Bara luve turana nivivi, mu gu vakatora tabu a niluhoi nau. 33A Vure, ra viri i habi a nivalemu ne hita, ge made turane mua.
Copyright information for
BNP